Av: LOOP Miljøskole
Å ta vare på det ein hadde, var nødvendig i tidlegare tider. Ungane opplevde at det å reparere kle og utstyr samt utnytte mat og matrestar, var ein del av kvardagen. Dette er like nødvendig i dag, skal vi ta vare på alt som lever på jorda vår og bevare naturen for kommande generasjonar ????
Barn som opplever og lærer at det å ta vare på det vi har, både er bra for naturen og lommeboka, har eit godt utgangspunkt for å ta med seg dei gode vanane inn i vaksenlivet. Dette kan bety mykje for eit meir berekraftig samfunn i framtida ????
Her kan du sjå undervisningsopplegga LOOP Miljøskole har laga for barnehagar, med vekt på berekraftig utvikling. Vi lærer barn å vere snille mot mammaen sin. La oss ikkje gløyme Moder Jord!
Treets hemmelighet
I dette undervisningsopplegget blir hemmelegheita til treet avslørt; korleis kan det få grøne bladar kvar vår? De får òg forslag til spennande aktivitetar de kan gjere ute i naturen.
Redd noko som skulle kastast: Kle
Ved å reparere kle som barna brukar, vil dei sjå og lære at det går an å reparere tøy. Dette blir billigare for familien. Ein tek òg vare på naturen fordi ein ikkje treng å kjøpe nye kle så ofte, og det blir mindre avfall.
Redd noko som skulle kastast: Mat
Bruk opp mat som begynner å bli gammal. Bananer som har fått brune flekkar er knallgodt i smoothie, og tørre brødskiver kan bli herlege ostesmørbrød. Dette er òg bra for miljøet og lommeboka!
Redd noko som skulle kastast: Gjenbrukshylle
Å ha ei gjenbrukshylle i barnehagen kan gjere at bøker, kle og sko varer lenger. Ei bukse som eit barn har vakse i frå, kan bli den nye yndlingsbuksa til eit anna barn.
Leik og lær om emballasje
Tom emballasje, til dømes melkekartongar og rømmebeger, er eit godt utgangspunkt for leik. Når interessen for å leike har dabba av, kan barna vere med å kildesortere emballasjen.
Lag ein jordfabrikk: Bokashi
Bokashikompost er ei naturleg supernæring for plantar. Den er full av mikroorganismar som gjev dei beste vekstvilkåra for plantane våre. Få tips til korleis din barnehage kan komme i gong med ein heilt eigen jordfabrikk.
Lag ein jordfabrikk: Varmkompost
Bananskal, brødskorper og epleskrottar. Maten som barna ikkje et opp, kan bli til god mat (næringsrik jord) for blomstrar og plantar.
Lyst på meir?
Det er spennande å sortere og resirkulere avfall, og det er moro å sjå at det spirer og gror både inne og ute. Her finn de fleire tips til aktivitetar som lærer små barn om miljø og resirkulering.
Det er Unni Flatin, lærar og pedagog, som har utvikla desse undervisningsopplegga for barnehage. Varemerket til Unni er å formidle viktige og store emne på ein lettfatteleg, engasjerande og inspirerande måte, med eit vakkert og drøymande språk.
Velkommen inn i hennar univers ✨